Almenn afbrotafræði

Hvers vegna fremja sumir glæpi á meðan aðrir halda sig innan ramma laganna? Hvernig mótar samfélagið refsingar, réttarkerfi og viðbrögð við afbrotum? Almenn afbrotafræði veitir innsýn í þessi áleitnu viðfangsefni og tengir saman kenningar, rannsóknir og raunveruleg dæmi.

Smelltu hérna til að sjá sýnishorn af bókinni

Bókin byrjar á því að útskýra helstu kenningar í afbrotafræði, hvernig glæpir eru rannsakaðir og hvað tölfræðin segir okkur um þróun afbrota. Við skoðum einnig réttarkerfið, bæði hérlendis og erlendis, og hvernig fangelsismál hafa þróast í gegnum tíðina, allt frá Alcatraz til samtímans.

Afbrot eru ekki bara glæpir á götunni – þau tengjast samfélagslegum aðstæðum, efnahagslegri stöðu og fjölmiðlaumfjöllun. Þess vegna fjallar bókin um hvítflibbabrot, heimilisofbeldi og félagslega stöðu afbrotamanna.

Nútíminn hefur einnig leitt af sér nýjar áskoranir, svo sem netglæpi, stafrænt eftirlit og skipulagða glæpastarfsemi sem nær yfir landamæri. Við skoðum einnig raðmorðingja, hryðjuverk og mannshvörf, ásamt því hvernig samfélagið bregst við þessum afbrotum.

Að lokum fjallar bókin um fórnarlömb glæpa og leiðir til að draga úr afbrotum. Getum við spáð fyrir um afbrot áður en þau eiga sér stað? Hvernig getur samfélagið brugðist við afbrotum á skilvirkari hátt?

Almenn afbrotafræði er skrifuð fyrir alla sem vilja skilja hvernig afbrot verða til, hvaða áhrif þau hafa og hvernig samfélagið bregst við þeim. Með skýrum dæmum, raunverulegum rannsóknum og einföldum útskýringum er markmiðið að gera afbrotafræði aðgengilega og áhugaverða fyrir alla.